Советот на Општина Тирана со мнозинство гласови го разреши од функцијата градоначалникот на албанскиот главен град, Ерион Велиај.

„Советниците од неговата, Социјалистичка партија и демократите ги здружија своите гласови, согласувајќи се да го отстранат Ерион Велиај од функцијата. Против беа четворица советници-негови сопартијци“, објави Топ чанел.

Одлуката беше донесена по барањето на премиерот Еди Рама  на седница на Националното Собрание на Социјалистичката партија, каде што ја објави кандидатурата на Огерта Манастирлиу за вонредните избори.

„И покрај разрешувањето, според член 115 од Уставот, на Велиај му е дадено право да поднесе жалба против разрешувањето до Уставниот суд во рок од 15 дена. Во овој случај, одлуката на владата, која ќе биде донесена, е суспендирана додека Судот не ја разгледа“, додава телевизијата.

Велиај беше близок соработник на Рама, кого го подготвуваше за  негов наследник на чело на Социјалистичката партија.

Тој беше во својот трет градоначалнички мандат кога, на 10 февруари, беше уапсен по налог на Специјалното обвинителство против корупција и организиран криминал (СПАК) и е во затворски притвор, под обвинение за создавање коруптивна шема меѓу компании и невладини организации поврзани со неговата сопруга, Ајола Џоџа и група бизнисмени блиски до него.

На 10 септември, СПАК ги испрати досиејата на Велиај, Џоџа, поранешната пратеничка од социјалистичката партија Клотилда Бушка и уште 15 други лица на суд.

Велиај е обвинет по 13 точки од обвинението, вклучувајќи корупција, перење пари, па дури и чување нелегални предмети во ќелијата за време на притворот.