Босилек, магдонос, семки од тиква и пет минути работа се сè што ве дели од вкусниот песто-сос кој можете да го користите за сендвичи, тестенини или како додаток на салати.

Освен што е вкусен, ваквиот сос е полн и со здрави минерали и растителни влакна.

За мерка, можете да користите чаша од 250 мл.

Потребни состојки:

• 1 чаша пржени семки од тиква (излупени)
• 1 чаша добро маслиново масло
• 2 чаши листови босилек
• 1 чаша сечкан магдонос
• 4 супени лажици свежо исцеден сок од лимон
• 4 чешниња лук
• сол

Подготовка:

Ставете ги семките од тиква, излупениот лук, босилекот, магдоносот и сокот од лимон во блендер и, додека мешате, полека додавајте го маслиновото масло. Мешајте додека не добиете кремаст сос. Посолете по вкус.

Да се ​​чува во фрижидер до два дена.