В недела од 20.30 часот пред полни трибини во СЦ „Борис Трајковски“ – Скопје ќе се игра реваншот од финалето во ЕХФ Европскиот куп помеѓу РК Алкалоид и АЕК Атина.

Играчите предводени од тренерот Кирил Лазаров имаат убава предност од 29:25 од првиот натпревар и имаат одлична шанса да се закитат со историски европски трофеј.

Пред возвратниот дуел претседателот на РК Алкалоид, Горан Минов апелира за фер и коректно навивање:

– Драга публико, почитувани навивачи, наш осми играч на теренот, во пресрет на финалниот ракометен напревар од ЕХФ Европскиот куп меѓу РК „Алкалоид“ и РК „АЕК“, упатуваме искрен апел до нашите поддржувачи – да jа покажеме љубовта кон македонскиот ракомет и кон ракометниот клуб АЛКАЛОИД со фер и спортско навивање.

Да навиваме со срце, да бодриме со почит и да покажеме дека вистинските навивачи се дел од фер-плејот на теренот. Ви благодариме за сета досегашна поддршка и убавите коментари за првиот одигран натпревар против РК „АЕК“. Во недела имаме пред нас уште 60 минути тежок и голем предизвик. Публиката како никогаш до сега имаме потреба да нè бодри, да навива за нас, покажувајќи респект и почит кон гостинската екипа, во духот на фер-плејот.

Со нас на трибините во недела ќе биде и нашиот најмлад навивач кој има само 2 години, а единствената официјална навивачка група на РК „Алкалоид“ „Кафетинки“ се вистински пример за тоа како е да се навива гласно, но од срце и со стил! Да бидеме пример за спортска култура кон нашиот тим, гостите и претставниците на европската куќа на ракометот, затоа што спортот не е само борба за победа, туку и празник на почитта, заедништвото и витешката игра. Да навиваме фер и со срце: Напред Алкалоид! – се зборовите на Минов.

Лазаров: Имаме одлични „плус четири“, треба порелаксирано да го дочекаме реваншот против АЕК

Маркоски: Со цврста одбрана да дојдеме до нова победа и историски европски трофеј