Подготовките за претстојното 31. издание на популарниот „Охрид фест – Охридски трубадури“ се во полн ек: годинава фестивалот ќе се одржи на 30 и 31 август на добропознатата величествена сцена на Долни Сарај.

„Охрид фест“ е еден од најпознатите музички фестивали што низ својата историја оставија сериозна трага во нашата музичка индустрија, но е познат и надвор од границите: во изминатите три децении допре до повеќе од 200 милиони гледачи, се емитуваше во педесетина земји во Европа и низ светот, во фестивалската биографија е запишано дека на него настапија пејачи од 37 земји, но тој е и значаен симбол на градот Охрид.

– Токму затоа „Охрид фест“ широко ги отвора вратите за сите охриѓани и за оние што во тој период ќе бидат во убавиот Охрид, бидејќи влезот е слободен – информира Григор Копров, првиот човек на фестивалот.

– Што се однесува до ова издание, со целото искуство што го имам и со здружени сили на тимот со кој работиме со години, нѐ очекува одличен фестивал, со многу добри песни, со настапи на нашите докажани имиња, гости од странство, ѕвездите од поранешна Југославија, но и многу млади пејачи. Новината е што од годинава имаме соработката со Канал 5, соработка на која искрено се радувам – заврши Копров.

Традиционално фестивалот ќе почне со Фолк вечер низ која ќе води шармантната Ирена Спировска и каде што покрај докажаните Благоја Грујовски, Катерина Танева, Благица Павловска, Петар Нечовски, Милица Кузмановска, група „Биоритам“, шанса за убав старт ќе имаат и нови музички надежи.

Интернационалната вечер е резервирана за поп-музиката и младите, но и за етаблирани имиња од Србија, Хрватска, Босна, Словенија, Бугарија…

Омилената водителска двојка Марјана Станојковска и Васил Зафирчев ќе бидат на своите позиции, а на фестивалот ќе ги видиме Јелена Томашевиќ, Дадо Топиќ, Гоца Тржан, Срѓан Марјановиќ, Брано Ликиќ, Тони Мишел, Принц од Врање…

„Охрид фест“ ги поддржува младите, но е познат и како фестивал што има долга меморија и ги почитува уметниците што оставиле трага во музиката, не го заборава квалитетот на уметниците кои за адутот го имаат траењето. Во тој контекст, за безвременска песна е прогласена „Одисеја“ што маестрално ја пее Лео Мартин, композиција која го издржа тестот на времето од 1973 година.

Организаторите најавуваат уште изненадувања, а директниот пренос на „Охрид фест“, на 30 и 31 август, од 21 часот годинава ќе се случува на телевизија Канал 5.

„Охрид фест“ останува доследен на себеси, да слушате, да гледате и да уживате во музиката!

(Комерцијален текст)