На 34. издание на Саемот на книга, кој по две години се врати во својот редовен пролетен термин, беше надмината бројката на вообичаената посета на читателите, која се искачи на 23.800 посетители.

– Сме организирале многу саеми, големи, гламурозни, технолошки напредни, но токму Саемот на книгата остана да нè вреднува налик на Хамлетовото „да се биде или не?“ Не ни беше тешко да ја преместуваме манифестацијата, да ја организираме со маски, со сертификати, без сертификати, но во овие времиња не е важна формата, конечно. Ќе дојде време ќе посветиме внимание и на формата, но најважно беше манифестацијата да опстои! Со книга докажавме дека може да ги победиме сите премрежија – изјави Даниела Глигоровска, извршен директор на „Глобал медија груп“.

На саемот се претставија повеќе од 60 издавачки куќи од Македонија, Турција, Србија, Косово и Албанија, а значајно претставување имаше и Министерството за култура и туризам на Република Турција.

За време на саемот се доделија наградите во организација на Македонската асоцијација на издавачи (МАИ) и се организираа повеќе од 30 промоции во промотивниот центар. Саемот на книга се организираше под покровителство на Министерството за култура.

(Текстот е објавен во „Културен печат“ број 128, во печатеното издание на весникот „Слободен печат“ на 14-15 мај 2022)