Димензиите на првиот цепелин во светот биле незамисливи на почетокот на минатиот век. Бродот имал алуминиумски скелет, обвивка, гасни ќелии, погон со два мотори распоредени на двете гондоли, бил долг 128 метри и имал дијаметар поголем од 11 метри, јавува ДПА.

Тоа бил почеток на не секогаш успешна кариера – пред 125 години, на 2 јули 1900 година, од Фридрихсхафен полетал првиот цепелин. Германскиот пионер на авијацијата, грофот Фердинанд фон Цепелин, го извел првиот пробен лет на воздушниот брод ЛЗ 1.

Цепелинот се издигнал од пловечката монтажна сала кон вечерното небо над Боденското езеро, како што се наведува во денешниот есеј на компанијата „Zeppelin Luftschifftechnik GmbH“.

На бродот имало пет лица, а погонот го обезбедувале два мотори Дајмлер (Daimler) од по 14,2 коњски сили секој. Првиот лет траел 18 минути, по што бродот се вратил во хангарот.

„Тоа беше во секој поглед огромен чекор во технички непознат терен и сериозен ризик“, рекол Јирген Блајблер од Музејот на цепелин во Фридрихсхафен.

Воздушниот брод тогаш брзо дошол во стрмна косина – што била многу незгодна позиција во летот. Сепак, ништо не се случило.

„Фактот што бродот останал колку-толку управлив во таа позиција и безбедно слетал, всушност го претставувал успехот на првиот лет“, објаснува Блајбер.

Димензиите на цепелинот биле незамисливи за тоа време.

Грофот фон Цепелин бил лично на бродот како командант на првиот лет.

Тест летовите со толку голем брод не можеле да се случат далеку од очите на јавноста. Грофот сакал внимание.

Од самиот почеток, тој сакал, покрај обичните луѓе, особено да ги импресионира политичарите, аристократијата, бизнисмените и војската со своите величествени воздушни бродови. Но, пробивот се случил многу години подоцна.

За цепелинот, тој прв лет започнал долга приказна полна со подеми и падови.

Тој се збогувал со прототипот по уште две полетувања – не само поради парите, туку и затоа што подобри технички решенија брзо се појавиле во првите години од минатиот век.

На крајот на 1905 година, започнале првите обиди со наследникот модел ЛЗ 2.

Цепелинот можел безбедно да лета на подолги растојанија само години подоцна, со понови модели. Проблемите со моторот и честопати лошото време го отежнувале тоа.

Сепак, пресвртницата дошла токму со катастрофата кај Ехтердингс во 1908 година.

По принудното слетување, ЛЗ 4 го зафатил налет на ветар, го однел преку дрвјата и на крајот изгорел.

Десетици илјади набљудувачи ја виделе несреќата, а потоа низ цела Германија се проширил бран на солидарност со грофот – народот собрал повеќе од шест милиони марки.

По употребата на цепелини во Првата светска војна, пресвртница дошла во дваесеттите и триесеттите години. Се движи со патнички интерконтинентални линии, благодарение на сè поголемиот домет без запирање од од 10.000 километри.

Со изградбата на Хинденбург во 1936 година, започнале редовни линии до Соединетите Американски Држави.

Тоа траело околу една година, до мај 1937 година, кога бродот изгорел во „Лејкхeрст“, се сеќава Блајблер.

Задниот дел од трупот на воздушниот брод ЛЗ 129, исполнет со водород, се запалил при слетувањето на аеродромот „Лејкхерст“ кај Њујорк.

Во катастрофата загинале 35 патници и членови на екипажот, како и еден член на копнената екипа. Со тежина од околу 120 тони, тогаш најголемиот цепелин во светот, бил целосно уништен.

Според зборовите на експертите, фасцинацијата со цепелините до ден-денес не исчезнала.

„Големината, бестежинската состојба – цепелинот сè уште има многу добра репутација“, рекол Блајблер.