На поранешниот селектор на Македонија Чедомир Јаневски му оди одлично на клупата на АЕЛ Лимасол.

Вечерва во натпревар од деветтото коло АЕЛ на гости славеше победа од 0:3 против Акритас Члорака. За Јаневски ова беше четврти триумф во петтиот натпревар од кога седна на клупата. Од можни 15 бодови тој освои дури 13 и АЕЛ со него изгледа одлично на теренот.

Треба да се спомене дека кога тој дојде во клубот АЕЛ беше некаде на дното на табелата, но во период 40-тина дена колку што е во клубот тој направи тим кој може да се бори дури и за излез во Европа.

Јаневски низ кариерата беше на клупата на голем број клубови, меѓу кои Црвена звезда, Клуб Бриж со кој го освои Купот на Белгија во 2007 година, а една година порано со грчкиот Олимпијакос како помошник тренер дојде до трофеите во првенството и купот на таа земја.