Милијардерот и доскорешен член на блискиот круг на американскиот претседател Доналд Трамп, Илон Маск, се огласи по наводите кои ги објави „Њујорк тајмс“ дека тој користел различни видови дрога за време на кампањата за избор на Трамп во Белата куќа. Маск ги нарече информациите „глупости“ и рече дека доколку тоа било точно, би било „исклучително очигледно“, пренесува „Аксиос“.

Извршниот директор на „Тесла“, кој неделава ја напушти претседателската администрација и му се врати на бизнисот, реагираше откако њујоршкиот весник вчера објави текст во кој се повикува на анонимни извори кои тврдат дека интензивно користел кетамин, екстази, спид и психоделични печурки за време на претседателската кампања на Трамп.

„Тajмс“ пишува дека Маск наводно земал толку многу кетамин, што тоа почнало да му влијае врз мочниот меур, а во неговата мобилна аптека, велат изворите, имало околу 20 видови таблети, вклучувајќи стимуланси како што е „Адерал“, кој содржи амфетамин.

Во текстот се наведува дека употребата на дроги можеби стои зад неговото „непредвидливо однесување“, вклучувајќи го и контроверзниот поздрав многу сличен на нацистичкиот на еден политички митинг и нејасните одговори за време на медиумски настапи.

Во објава на неговата мрежа, „Икс“, Маск го нарече написот „апсолутна глупост“ и додаде дека неговото секојдневно присуство на состаноци и фотографирања со десетици и стотици луѓе би направило злоупотребата на супстанции да биде „исклучително очигледна“.