Со пораката дека демократијата треба да се заштити, германската министерка за надворешни работи Аналена Бербок се обрати на дводневниот Глобален медиумски форум (ГМФ) на Дојче веле што се одржува во Бон.

На Форумот се пријавени околу 1.500 медиумски професионалци – новинари, сниматели, фотографи, аналитичари, академици и претставници на различни области од повеќе од 100 земји. Под мотото „Споделување решенија“ дебатираат за решенија за важни прашања коишто се однесуваат на новинарството и медиумите низ светот, вклучително и за заканите кон новинарите, дезинформациите и промените што ги носи вештачката интелигенција.

За дел од овие прашања говореше и Бербок со посебен акцент на моќта на новинарството како глас на оние што не можат да бидат гласни и не можат да бидат слушнати.

– Демократијата не е падната од небо. Мора да ја заштитиме – изјави Бербок, објаснувајќи дека некои аспекти од, како што рече, отворените општества за кои луѓето претходно сметале дека им се дадени, како на пример еднакви права за сите полови или правото на абортус сега се оспорени од одредени политички актери.

Клучна година за демократијата

Што се однесува до новинарите, според Бербок, тие ја бранат демократијата, а онаму каде што слободата на медиумите е под притисок, во опасност е слободата за сите граѓани.

Според дел од учесниците, „ова е клучна година за демократијата“, еден вид „пресвртна точка“ за меѓународниот поредок заснован на правила.

„Дури 71% од светот сега е под авторитарна власт. Демократијата се ‘лизга‘, нашиот прозорец за дејствување се затвора, но тој сè уште е таму“, беше кажано на Форумот.

На панелот на кој говореше Бербок се дебатираше и за онлајн сексуалното вознемирување особено на жените, а таа го изнесе сопствениот пример од времето пред да стане министерка кога на социјалните медиуми била сексуално вознемирувања со лажни фотографии и нарекувана проститутка.

Форумот на кој се дискутира како да се известува од конфликти, како да се осигури безбедност за новинарите, како да се бори против дезинформациите, како и за цензурата на интернет чија цел е да се потисне квалитетното новинарство, претходно го отвори генералниот директор на Дојче веле, Петер Лимбург.

– Дури и во црни времиња оптимизмот е подобар начин за справување со овие проблеми, бидејќи песимистите обично не придонесуваат да се дојде до решенија. Ајде да ги споделиме решенијата и идеите – рече Лимбург.

Учесниците на Форумот ги поздрави и лидерот на германската држава Северна Рајна Вестфалија, Хендрик Вуст кој во снимена порака ја нагласи критичната улога на унапредувањето на медиумската писменост во дигитална ера.

– Дигитализацијата, со своите брзорастечки и брзо развивачки информациски способности, е и можност и предизвик. На многу луѓе им е тешко да разликуваат вистинити и лажни информации, со што се истакнува потребата од медиумска писменост – изјави тој.

Протест за ослободување на новинари во Азербејџан

И додека во Светскиот конференциски центар, кој инаку е поранешниот парламент (Бундестагот) од времето кога Бон беше главен град на Германија новинарите дискутираа за тоа кои политички и социјални процеси се неопходни за да се направат општествата и демократиите поотпорни, а различните гласови да станат повидливи низ медиумскиот пејсаж, на платото пред центарот се одржа мирен протест на новинари од Азербејџан. Тие, како што рекоа, сакаат да го свртат вниманието на состојбата со новинарите во нивната земја.

Новинарот Абид Кафаров за „Слободен печат“ вели дека во Азербејџан во затвор се 30 новинари и бараат веднаш да бидат ослободени.

– Новинари и медиумски работници се уапсени и речиси сите се подложени на тортура, а на некои им се закануваат со силување ако не потпишат признание дека се виновни. И јас бев приведен врз основа на фабрикувани обвинувања бидејќи истражував тортура во полиција и во обвинителство. Сега повикуваме на соработка и солидарност од Медиумскиот форум да се обрне внимание на оваа ситуација. Бараме нашите новинари веднаш да бидат ослободени – вели Кафаров, новинар и автор на книга за полициската тортура во неговата земја, која што веднаше била забранета и сите примероци запленети.