Главната вечер на нашиот најголем музички фестивал „Таксират“, а во чии рамки ќе настапат повеќе од 15 музички артисти, ќе се одржи на 7 декември на две бини во арената „Борис Трајковски“ во Скопје. Илјадници гости од цела Македонија, но и од соседните земји пристигнуваат во Скопје за музичкиот настан на кој со маратонската осумчасовна програма ќе биде означено и официјалното затворање на овогодинашното 26-то издание на фестивалот „Таксират“.

Македонската публика за првпат ќе има прилика во својата земја да ги пречека и да ужива во настапите на светските ѕвезди од електронска сцена и тоа: еден од најуспешните британски диџеи и продуценти, заштитното лице на светскиот текхаус звук Hot since 82, како и Röyksopp – беспрекорните уметници на современиот електронски звук и култно име од норвешката електро-поп сцена.

Покрај нив, на Главната „Мтел“ бина пристигнуваат и дел од најпопуларните регионални артисти, а меѓу нив е актуелниот херој на евровизиската публика, Бејби Лазања од Хрватска, кој за првпат доаѓа кај нас. Тој на „Таксират“ ќе го претстави својот експлозивен настап со кој остварува неверојатен успех годинава и со месеци однапред распродадени концерти низ цела Европа! Од Загреб на „Таксират“ пристигнува и омилениот концертен бенд „Елементал“, докажан меѓу најдобрите изведувачи во живо на Балканот.

На Главната „Мтел“ бина ќе настапат и легендарните „Партибрејкерс“, најискрениот рок-бенд на овие простори, кој го одликуваат ненадминливо моќни настапи, панк-енергија, блузерска душа и гараж став!

Вонсерискиот мајстор од белградската рап-сцената Смоке Мардељано ќе го преземе кормилото за врвен хип-хоп на втората бина, „Smooth Stage“ на „Таксират“, а во мисијата ќе му се придружат и неговите сограѓани, исклучително почитуваните од рап-заедницата во регионов „Прти бе ге“.

На оваа бина ќе може да се проследи и настапот на младиот словенечки уметник кој важи за глас на новата генерација „Ружно паче“. Домашната сцена ја претставуваат артистите кои стојат зад епските забави на оваа бина на „Таксират“, екипата на „Trap Da Fuck Up“, која сега премиерно ќе го претстави својот сосема нов аудио-визуелен проект „TDFU Arcade“. Со овој проект тие презентираат дел од својот најинтригантен материјал во нов концептуелен настап во кој учествуваат Бон Праскиза, Секси Марса, Диџеј Огипсилон, Жакк/5Р, Балу, Стиви, Рагер и други.

Во концертната арена завршуваат последните подготовки за овој музички спектакл, а дел од странските ѕвезди веќе се пристигнати во Скопје. Влезот за посетителите во арена „Борис Трајковски“ ќе биде отворен во 19:30 часот, а објавен е и распоредот со саатници за концертните настапи.

Претходно, во рамки на офф-програмата на „Таксират“ во Скопје се одржаа повеќе од 70 концерти на различни локации во градот. Оваа сабота, пак, илјадниците вљубениците во квалитетната музика се собираат заедно за финалниот настан со кој во арената „Борис Трајковски“ ќе биде заокружено ова импресивно издание на фестивалот „Таксират“.