Пред нас е 95. издание на свеченото доделување на најпрестижните филмски награди Оскари, со кои Академијата за филмски уметности и науки ќе ги награди најзаслужните имиња во филмската индустрија за изминатата година.

Церемонијата ќе се одржи на 12 март, во театарот „Долби“ во Лос Анџелес, САД. Домаќин на целиот настан ќе биде познатиот комичар Џими Кимел, кој по третпат ќе се најде во улога на водител на Оскарите. Меѓу презентерите на наградите ќе ги видиме Хали Бери, Антонио Бандерас, Елизабет Бенкс, Џесика Честејн, Ендру Гарфилд, Хју Гранд, Никол Кидман итн.

Филмот „Everything Everywhere All at Once“ поведе со најголем број номинации, вкупно 11, и важи за најголем фаворит за добитник на најпосакуваната статуетка во категоријата за најдобар филм на годината. Во оваа категорија се натпреваруваат и филмовите „All Quiet on the Western Front“, „Avatar: The Way of Water“, „The Banshees of Inisherin“, „Elvis“, „The Fabelmans“, „Tár“, „Top Gun: Maverick“, „Triangle of Sadness“ и „Women Talking“.

Воената драма „All Quiet on the Western Front“, која е филмска адаптација на истоимениот роман на Ерих Марија Ремарк од 1929 година, е номинирана за дури девет Оскари, а со исто толку номинации се закити и ирската трагикомедија „The Banshees of Inisherin“. Биографскиот филм за „кралот на рокенролот“ Елвис Присли, „Elvis“ е номиниран во осум категории.

Легендарниот режисер Стивен Спилберг е одамна докажан во својата филмска мајсторија, кој и ден-денес сѐ уште воодушевува со своите дела. Неговиот филм „The Fabelmans“ освои повеќе награди во актуелната сезона на награди, а номиниран е и во седум оскаровски категории. Главна конкуренција на Спилберг во категоријата за најдобра режија се Тод Филд („Tár“), Дан Кван и Даниел Шајнерт („Everything Everywhere All at Once“), Мартин Мекдона („The Banshees of Inisherin“) и Рубен Естлунд („Triangle of Sadness“).

Што се однесува до категоријата за најдобра актерка, таму главен фаворит е докажаната Кејт Бланшет, за својата улога во филмот „Tár“. Покрај неа, номинирани се и Мишел Јео, Ана де Армас, Мишел Вилијамс и Андреа Рајзборо. Кај машките актерски имиња, борбата ќе се води меѓу Остин Батлер, Колин Фарел, Брендан Фрејзер, Пол Мескал и Бил Наји.

Вести од сезоната на награди:

Златен глобус 2023: „The Banshees of Inisherin“ и „The Fablemans“ со блескава победа на годинашните филмски награди

„Critics’ Choice“ 2023: „Everything Everywhere All at Once“ прогласен за најдобар филм на годинашните награди

БАФТА 2023: „All Quiet on the Western Front“ со апсолутна победа на британските филмски награди

САГ награди: Доминација на драмедијата „Everything Everywhere All at Once“