Скопје е преплавено со отпад, а мини депонии можат да се забележат околу секој контејнер. Граѓаните  прашуваат зошто „Комунална хигиена“ не си ги врши обврските за кои е надлежна и зошто редовно не се собира комуналниот отпад, особено во населбите со куќи, каде нема контејнери туку канти, кои исто така треба редовно да се празнат.

Вчера градоначалникот на Центар, Горан Герасимовски алармираше дека дебармаалци се разбудиле „во смет“, со преполни неисчистени контејнери, додека, како што нагласи ЈП „Комунална хигиена“ е на продолжен викенд. Поради тоа, наместо градските комуналци, општински служби интервенирале со сопствени ресурси и го подигнале сметот од центарските улици.

Сите ние имаме одговорност пред граѓаните, чистотата мора да биде главен приоритет. Наместо ЈП „Комунална хигиена“ да праќа деманти дека секојдневно го собира и транспортира комуналниот отпад според динамиката утврдена со Оперативната програма, апелираме од утре, од 7 часот изутрина центарските улици да бидат чисти – нагласи Герасимовски.

Но, тоа не се случи ниту денес, па како што забележа фотографот на „Слободен печат“, општинските служби и денеска го собираа ѓубрето од и околу преполните контејнери.

И градоначалникот на Аеродром, Дејан Митески, се пожали дека имаат голем проблем со сметот поради нефункционирање на Град Скопје. Тој нагласи дека иако градоначалничката Данела Арсовска тврди дека „Комунална хигиена“ работи нормално, на терен тоа не се забележува.

Како општина ангажираме дополнително ресурси повеќе од 100 вработени секој месец кои што покрај „Комунална хигиена“ која што не си ја врши работата, одат да ги празнат контејнерите, да собираат кабест отпад, да чистат покрај контејнери по улици, по паркови и така натаму. Така да ова е реален, сериозен проблем поради нефункционирање на градот, рече Митески во гостување на радио Лидер.

Од јавното претпријатие изјавите на Митески ги сметаат за целосна невистина, особено изјавата дека општината ангажирала 100 дополнителни вработени што ги празнат контејнерите и собираат кабаст отпад, од причина што, како што тврдат од „Комунална хигиена“, општината не поседува специјални комунални возила соодветни за празнење на контејнерите наменети за комунален отпад.

Не разбираме на кој тоа начин вработените во општината можат да ги празнат овие контејнери?!? Напротив, вработените во општинските служби секојдневно ги полнат контејнерите во коишто го истураат отпадот што го собираат при чистењето на сервисните улици и реони кои се во нивна надлежност, за што имаме голем број на сведочења од граѓаните во општината. Го замолуваме Митески нека ја информира јавноста каде завршува отпадот што неговите општински служби секојдневно го собираат во канти при одржувањето на хигиената на општинските улици и паркови?  Секако дека истиот се истура во контејнерите наменети за одлагање комунален отпад од страна на домаќинствата- велат од претпријатието.

Во однос на кабастиот отпад, од претпријатието велат дека во текот на 2024 година во општината Аеродром се отстранети 200 кубни метри кабаст отпад од јавни површини, а само во текот на месецот април 2025 година екипите на ЈП Комунална хигиена-Скопје подигнале околу 100 кубни метри непрописно одложен кабаст отпад.

Неодамна градските комуналци ја демантираа и Општина Чаир дека отпадот на оваа територија не се собира редовно. Според нив и во Чаир и во сите останати скопски општини, секојдневно го собира и транспортира комуналниот отпад без никаков застој, согласно динамиката утврдена со Оперативната програма за собирање и транспортирање на комуналниот отпад од подрачјето на градот Скопје.

Наместо „Комунална хигиена“, Општина Центар го исчисти сметот во Дебар Маало

Од „Комунална“ обвинија дека во оваа Општина е забележана масовна појава на непрописно фрлање кабаст и градежен отпад на јавни површини, особено во непосредната околина на контејнерите наменети за одлагање на комуналниот отпад, па само во текот на април реализирале повеќе од 20 вонредни активности за чистење при што биле отстранети дополнителни 430 кубици отпад од диви депонии. Притоа, како што тврдат во изминатиот период осумдесет дотраени контејнери на повеќе локации во Чаир се заменети со нови.

Но, додека комуналците ги демантираат изјавите на градоначалниците, не можат да постигнат да ги демантираат граѓаните кои со фотографии по социјалните мрежи ја илустрираат ужасната состојба со ѓубре и преполните контејнери во сопствените населби, нивното незадоволство и нивните барања за чиста животна средина.

Градоначалничката нема да тера втор мандат и воопшто не се замара што Скопје се гуши во отпад. Сите плати треба да ги врати. Не испорача никакви резултати – е една од денешните пораки од жителка на Аеродром до градското раководство.