Денес, на 11 мај е роден пејачот и кантавтор Ѓорѓе Балашевиќ во Нови Сад, Србија. Тој е еден од најомилените пејачи во регионот, кој го слушаат различни генерации. Иако од мали нозе покажувал интерес и талент за музика, неговите родители не се сложувале со изборот на кариера, па никогаш не отишле на негов концерт. Со пишување песни започнал уште како ученик во основно училиште, а во трета година од гимназијата, се откажал од училиштето и вонредно ги положил предметите. Започнал да студира географија, но го напуштил и факултетот за да се занимава со музика.

Во 1977 бил член на бендот „Жетва“, со кој ја снимиле песната „U razdjeljak te ljubim“. Песната имала голем успех, достигнувајќи продажба од 180.000 примероци. По, само една година го напушта бендот и формира нов бенд, под името „Рани мраз“. Овој бенд исто така, нижел успеси, а песната од тоа време “Računajte na nas“ стана химна на многу генерации.

На фестивалот во Сплит, во 1979 година, добива награда за песната „Panonski mornar“. Својата кариера ја продолжува распродавајќи осум концерт во салата на „Белградскиот дом на синдикатите“. Соработувал со многу големи имиња од Балканот, како што е Здравко Чолиќ, Бора Чорба, бендот „Srebrna krila“.

Во деведесетите, јавно покажал дека е противник на националистичката политика на Слободан Милошевиќ, повикувајќи го народот на мир. По војната, тој настапува на концерти во Сараево. Бил и амбасадор на добрата волја на Обединетите нации.

Покрај својата долга и богата кариера, Балашевиќ и во приватниот живот бил успешен. Беше во брак 40 години со својата сопруга Оливера. Од овој брак тој ги има децата Јована, Јелена и Алекса.

На 19 февруари 2021 година, почина како последица од пневмонија. Веста дека почина Балашевиќ шокираше многумина од Балканот. Колкава беше љубовта и почитта кон него покажаа обожавателите кои во тој трагичен момент излегуваа на улиците и заедно ги пееја неговите хитови.