„Демографската состојба во Македонија е тешка и никогаш не била полоша“, рече националниот координатор за демографија, млади и човечки ресурси Владимир Ѓорчев во емисијата „Анализа“ на ТВ24. Како што рече Ѓорчев, во моментов се подготвува „демографска стратегија која ќе донесе позитивни мерки за државата во наредните 20 години“.

„Мора да се работи на оваа тема и да се подобрат бројките. На пример, во 2023 година во Македонија се родени 17.700 бебиња. Тоа е најмалку досега во историјата на Македонија. Во 1950 година имало по 50.000 бебиња годишно“, рече Ѓорчев и додаде дека за падот на бројот на новородени бебиња виновни се од претходната власт со нивните, како што ги нарече, „антисемејни политики“.

„Го суспендираа надоместокот за трето дете, ние имавме ситуација каде што од 2008-мата, кога се воведе, до 2014 година бројот на третородени деца во Македонија беше зголемен за 40%. Значи од 2600-700 отидовме на 3700-3800 третородени деца во Македонија. Сега бројот на третородени деца е 1700-1800. Преполовен е“, рече тој.

Ѓорчев вели и дека приоритет на новата Влада ќе остане подобрување на демографската слика во државава, но и подобрување на условите за живот, мерка која ќе придонесе за помало иселување.

Ѓорчев: Демографската состојба е тешка, виновни се „антисемејните политики“ на претходната власт