Најдобрата македонска тенисерка Лина Ѓорческа ја продолжи серијата победи на турнирите во Романија и се наоѓа на еден чекор од нова титула во оваа земја.

Денеска во полуфиналниот меч на W75 турнирот во Букурешт со резултат 2:0 во сетови триумфираше над првата носителка на турнирот, Деспина Папамихаил од Грција за еден час и 21 минута игра.

Ѓорческа, која е четврта носителка, при резултат 2:2 на стартот од мечот, запиша четири гема во низа за освојување на првиот сет (6:2).

Папамихаил поведе со 1:0 во гемови во вториот сет, но следуваше нова фуриозна серија од четири гема на Ѓорческа и потоа само рутински го одведе мечот до самиот крај за нов триумф на турнирот.

Македонската тенисерка во финалето во Букурешт ќе игра со победничката од дуелот меѓу Лили Тагер од Австрија и втората носителка, Сада Нахимана од Бурунди.