Две девојчиња и две момчиња, сите малолетни, завчера вечерта натепале и ограбиле исто така малолетно девојче во парк во скопската населба Ѓорче Петров, соопшти МВР. Според полицијата, додека три од децата го вршеле насилниот чин, четвртото снимало со телефон.

„Денеска во 01.25 часот во СВР Скопје, И.Б.(41) од Скопје пријавила дека на 05.02.2025 околу 21.00 часот во парк на подрачје на Ѓорче Петров, нејзината малолетна ќерка била физички нападната од две малолетнички и еден малолетник, кои притоа ѝ одзеле чантата со пари, мобилен телефон и други лични работи, додека пак друг малолетник снимал со мобилен телефон“, пишува во полицискиот билтен.

Насилството меѓу деца во Ѓорче Петров ја потресе јавноста и пред неколку месеци, кога двајца првоодделенци сексуално малтретираа соученик во двор на основно училиште.