Српскиот тенисер Новак Ѓоковиќ вечерва се пласираше во осминафиналето на Мастерсот во Мајами, САД, откако во два сета го совлада Аргентинецот Камило Уго Карабели со 6:1, 7:6 (1).

Ѓоковиќ, петторангираниот тенисер во светот, по еден час и 47 минути оствари победа над 65 играч на АТП листата.

Во првиот сет Ѓоковиќ беше убедлив, му препушти само еден гем на противникот и со брејкови во вториот и шестиот гем поведе во сетови.

Во третиот гем од вториот сет, Ѓоковиќ ја искористи втората брејк топка, поведе со 2:1 во гемовите, но Аргентинецот веднаш одговори во следниот гем и израмни на 2:2.

До крајот на сетот немаше брејкови и победникот беше решен во тај-брејк, во кој Ѓоковиќ беше убедлив и оствари победа со мини брејкови во првиот, петтиот и осмиот поен.

Ѓоковиќ во осминафиналето ќе игра против 16 тенисер во светот Италијанецот Лоренцо Музети.