Гитарата, која Курт Кобејн своевремено ја искрши на сцена, е продадена за приближно 600.000 долари, соопшти аукциската куќа „Џулиенс“.

На крајот на тридневната аукција „Музички икони“ во Њујорк, инструментот бил продаден за точно 595.000 долари, што било изненадување и за организаторите, кои очекувале да добијат десетпати помала цена.

Имено, црниот „Фендер Стратокастер“ е повторно составен, но на него не може да се свири. На гитарата стојат потписите на тројцата членови на култниот гранџ состав „Нирвана“ – фронтменот Кобејн, басистот Крист Новоселиќ и тапанарот Дејв Грол.

„На гитарата сѐ уште се видливи пукнатините кои ги напрвил Кобејн. Кога беше на сцената и свиреше, Курт Кобејн беше машина. Тој беше лут и тоа можеше да се почувствува. Особено по начинот на кој ракуваше со своите инструменти“, изјавил Коди Фредерик од аукциската куќа.

Фредерик верува дека оштетената гитара го симболизира „оштетениот музичар“ и „суровото и бурно време“ во музиката.

Групата „Нирвана“ е основана кон крајот на осумдесеттите во северозападната американска држава Вашингтон. Групата се здоби со поширока слава во 1991 година со објавувањето на вториот албум „Nevermind“, кој беше продаден во повеќе од 30 милиони примероци.

Фронтменот на групата стана идол и глас на новата генерација, но во текот на животот се бореше со зависност и здравствени проблеми. Тој изврши самоубиство во Сиетл во април 1994 година, на 27-годишна возраст.