Земјата во годинава која штотуку започна треба да се фокусира на реформите што се неопходни за влез во ЕУ, целта околу која треба да се обединат сите политичари, но и целото општество, порача евроамбасадорот Дејвид Гир.

– Главната порака до политичарите, а не само до Владата се реформите, кои опфаќаат широк опсег на прашања кои ги засегаат граѓаните, од владеењето на правото, борбата против корупцијата, подобрување на стандардот на живеење и градење на економијата. Токму во овие полиња мора да се работи најмногу и најпосветено, рече Гир, одговарајќи на новинарско прашање при посетата на Делчево.

Тој додаде дека иако овие процеси треба да ги предводи Владата, сепак сите политичари, без разлика од која партија доаѓаат, мора да работат заеднички во интерес на државата и исполнувањето на критериумите и услови за влез во Европската Унија.

– Ова е работа што треба да ја предводи Владата, но исто така е нешто што мора да ги обедини сите, од сите политички страни, од сите страни на општеството, да се обединат, заеднички да работат кон заедничката цел – да се постигне демократска, мирна и просперитетна земја во рамките на ЕУ, изјави евроамбасадорот Гир.

Тој беше во посета на Делчево во рамки на акцијата за донирање пакети храна за 30-тина социјално загрозени семејства што ја организираше Делегацијата на ЕУ во земјава во соработка со Банката за храна.