Германија бара воспитувачи, негуватели, продавачи…
До 2028 година околу 770.000 работни места би можеле да останат непополнети во Германија поради недостиг на квалификувани кадри. Во кои сектори и професии се очекува најголемата празнина?
Во цела Германија недостигаат воспитувачи, социјални работници, негувател(к)и и продавачи, како и стручни кадри во други професии. Според студијата на Институтот за германска економија (ИВ), овој недостиг на кадар значително ќе се зголеми во наредните години. До 2028 година, се предвидува дека околу 768.000 работни места нема да можат да се пополнат со доволно квалификувани кадри. Во 2024 година, просечно недостасувале 487.000 работници.
Препорачано
„Главната причина е демографската промена. Многу луѓе ќе заминат во пензија во следните години“, вели авторот на студијата Јурек Тидеман.
„Ако не успееме да го ублажиме овој недостиг, тоа ќе стане уште поочигледно во секојдневниот живот.“ Ако недостигаат места во градинки и установи за нега, вработените нема да можат да го зголемат своето работно време бидејќи ќе мора да се грижат за деца и блиски.
Најголем недостиг кај продавачите
Авторите на студијата, врз основа на податоци од 2023 година и трендовите од изминатите години, анализирале како се развива пазарот на трудот во 1.300 професии. Најголемиот недостиг се очекува кај продавачите – таму би можело да се зголеми од над 12.900 на 40.470 непополнети места. Премалку млади се одлучуваат за обука во продажба, вели Тидеман.
На второ место се воспитувачите со околу 30.800 непополнети места. Потоа следуваат социјалната работа и педагогијата со повеќе од 21.150, како и здравствената и болничката нега со околу 21.350.
Голем пораст на вработените во ИТ-секторот
Експертите исто така анализирале во кои професии се очекува најголем пораст или пад на бројот на вработени. Најголем пораст се очекува во детската грижа – до 2028 година се предвидува дека ќе се пополнат речиси 143.400 нови работни места. Сепак, според авторите, тоа нема да биде доволно за да се задоволи побарувачката. Значителен пораст од 26% се очекува и во ИТ-секторот, поради дигитализацијата.
Најголем пад, пак, се очекува во металната индустрија – бројот на квалификувани работници таму би можел да се намали за околу 161.200 до 2028 година. Многу вработени ќе се пензионираат, а недостига нов кадар.
Се предвидува и значителен пад кај банкарските службеници – бројот на вработени би можел да се намали за околу 56.300. „Банкарскиот сектор се автоматизира. Филијалите се затвораат, а шалтерите се сè поретки. Затоа е потребен помалку персонал“, објаснува Тидеман.
Извор: Дојче веле
