Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за гурмански деликатес без кој не може да се замисли велигденската трпеза – велигденски милиброд (козињак).

– Мирисот што се шири низ куќата додека се пече велигденскиот милиброд е како музика за сетилата, поубав од мирисот на пролетните цвеќиња – порачува Бобе.

Состојки за две плетенки:

– 1 килограм брашно
– 4 јајца
– 50 мл масло
– жолчка за премачкување
– 1 пакување свеж или сув квасец
– 1 пакување ванилин шеќер
– 300 мл млако млеко
– 3 супени лажици шеќер
– прстофат сол
– 100 грама сува брусница, отстоена во млака вода
– 100 грама суво црно грозје, отстоено во рум
– рендана кора од лимон

Подготовка:

Се замесуваат брашното со квасецот – стасан во дел од млекото и јајцата, маслото, шеќерот и солта. Додека се замесува тестото по потреба се додава млеко. Убаво измесеното тесто се покрива со растеглива фолија и се остава 40 минути да се удвои тестото. Се измесува тестото и му се додава рендана кора од лимон, па се дели на четири топчиња (за две плетенки по две топчиња) кои се покриваат со памучна крпа и се оставаат да стасаат, 30 минути. Потоа се земаат две топчиња за подготовка на една плетенка, без месење со сукало се развлекува правоаголна кора од секое топче, врз едната кора се става брусницата, врз другата кора се става грозјето, потоа тестото се витка во форма на ролат, за да се добие долг ролат. Потоа, со остар нож се сечат одозгора во средина, се земаат двата ролати и се плетат со вртење меѓусебе, а плетенката се става во долгнавеста модла обложена со хартија.

Се оставаат да стасаат 20 минути, покриени со крпа. Одозгора се премачкуваат со жолчка и се печат во загреана рерна на 200 степени, 30-40 минути. Откако ќе се изладат, се сечат и се сервираат.
Уживајте во секој залог со овој прекрасен и сочен велигденски милиброд!