Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – домашен џем од смокви без конзерванси.

– Смоквите се вкусно и хранливо, нискокалорично овошје, корисно и здраво за јадење. Секако дека нема ништо поубаво од свежо овошје, но треба да се зачува и за останатите месеци во годината, а тука е ненадминлив домашниот џем од смокви. Ќе биде вистински деликатес, а и додаток на бројни слатки и колачи – порачува Бобе.

Состојки:

– 3 кг зрели смокви
– 1 килограм шеќер
– сок од 1 лимон
– мала лажица цимет
– 2 лажици рум

Подготовка:

Излупените и исечкани на четвртинки смокви се редат во длабоко тенџере. Се додаваат шеќерот и сокот од лимон. Се вари триесетина минути. Се додаваат румот и циметот. Се продолжува со варењето уште десетина минути. Топлиот џем се полни во топли тегли.

Останува само да уживате во прекрасниот вкус на џемот од смокви.

На здравје сладење!