Јованка Јанкоска Бобе, која стои зад блогот bobesbakery.mk, фејсбук и инстаграм-профилот, е вистински кулинарски креативец – нејзините рецепти се милина и за очите и за непцето.

Бобе денеска споделува рецепт за вистински гурмански деликатес – куглоф.

– Десерт кој ги комбинира богатството на чоколадото, освежувачата арома на портокалот и крцкавоста на бадемите. Оваа трио е нешто што никој не може да му одолее! Чоколадото носи длабок, неодолив вкус, портокалот додава светлина и свежина, а бадемите заокружуваат сè со својот вкус. Оваа комбинација е совршена за сите што сакаат да се потсетат на магијата што ја создаваат природните состојки кога ќе се спојат во совршен десерт – порачува Бобе.

Состојки:

За тестото:

– 250 грама брашно
– 200 грама шеќер
– 80 грама какао
– 1 прашок за печиво
– 1/2 лажичка сода бикарбона
– ванилин шеќер
– прстофат сол
– 2 јајца
– 250 мл млеко (измешано со 1 лажица лимонов сок)
– кора од еден портокал
– 80 мл масло
– 200 мл врела вода
– 100 грама чоколадни капки или исечкано чоколадо
– 100 грама бадеми печени, сечкани

За чоколадниот прелив:

– 100 мл слатка павлака
– 100 грама темно чоколадо

За преливот од портокал:

– сок од еден портокал
– 2 лажици шеќер
– 2 лажици нишесте

Подготовка:

1. Почнете со тоа што ќе го измешате млекото со лимоновиот сок и ќе го оставите 10 минути да отстои. Ова ќе го направи млекото да се згусне и да има благ киселкаст вкус, совршено за тестото.
2. Во посебна чинија, измешајте ги сите суви состојки: брашно, шеќер, какао, прашок за печиво, сода, ванилин шеќер и сол.
3. Додадете ги јајцата, маслото и млекото во сувите состојки и започнете да матите со миксер додека не се соединат сите состојки. Потоа постепено додавајте ја врелата вода и продолжете со матење, за да добиете ретка смеса.
4. На крај, додајте ги чоколадните капки и сечканите бадеми, па нежно измешајте.
5. Сипете ја смесата во намастен калап за куглоф и ставете го во претходно загреана рерна на 180 степени Целзиусови. Печете го 40 минути или додека не стане чврст и пријатно ароматичен.
6. Кога ќе го извадите од рерна, оставете го 10 минути да се излади, па потоа превтртете го калапот и внимателно извадете го куглофот.
7. Чоколаден прелив: Во тенџере, загрејте ја слатката павлака додека не започне да врие. Додадете ја врелата павлака врз исечканото чоколадо и мешајте додека чоколадото не се растопи и не добиете мазен прелив.
8. Прелијте го куглофот со чоколадниот прелив и оставете го да се излади. Кога ќе се излади, ќе бидете подготвени за преливот од портокал.
9. Прелив од портокал: Во мало тенџере, измешајте процеден преку ситна цедалка сок од портокал и шеќер, на средна температура со непрекинато мешање додете го нишестето претходно измешано со малку вода. Мешајте додека не се згусне и не се постигне кремаста текстура.
10. Прелијте го врз горниот дел и во средината (во длабнатината) куглофот со преливот од портокал и оставете да се лади.

Совет: За уште побогат вкус, куглофот можете да го декорирате со наросување на сечкани бадеми врз преливот од портокал.

Овој куглоф е идеален за секој што сака да ужива во меко, чоколадно задоволство, а со преливот од портокал ќе му додадете и дополнителна доза магија!