Животот навистина може да биде беспрекорно „вкусен“, а тоа го потврдува и Дијана Иваноска од Тетово, која со својот талент за комбинација на вкусови нè носи на едно исклучително гастрономско патување.

Иваноска стои зад инстаграм-профилот „Dash of Spice“ и ни ги открива малите тајни за создавање магија од вкусови.

Инвентивната Дијана денеска споделува рецепт за едно гастрономско уживање – куглоф со суво овошје и чоколада.

„Превкусна комбинација од суво овошје и чоколада. Зачинето со цимет и кора од портокал. Подготовката е многу лесна, само се спојуваат сувите и влажните состојки. Зачувајте си го рецептот и пробајте го. Сигурна сум дека ќе ви се допадне“, порачува Дијана.

Состојки:

– 180 г брашно

– 150 г шеќер

– 110 г путер

– 2 јајца

– 60 мл млеко

– 1 лажиче прашок за печиво

– 1 лажиче ванила екстракт

– кора од половина портокал рендана

– 1/4 лажиче сол

– 1/2 лажиче цимет

– 80 г чоколада сечкана или чоколаден чипс

– 35 г суво грозје

– 35 г брусница

За преливот:

– 200 г крем-сирење

– 120 г шеќер во прав

– 1 лажица млеко

– 1/2 лажица стопен путер

– 1 лажиче ванила

Подготовка:

1. Загрејте ја рерната на 175 степени Целзиусови.

2. Премачкајте го калапот за куглов со путер.

3. Изматете го путерот со шеќерот неколку минути. Додајте ги јајцата едно по едно. Изматете убаво пред да го додајте другото јајце.

4. Додајте ја ванилата и кората од портокал и изматете повторно.

5. Во друг сад измешајте ги сувите состојки: брашното, печивото, циметот и солта.

6. Ставете една 1/3 од сувите состојки, изматете, па додајте половина од млекото. Повторно дел од сувите, па млекото. Завршете со сувите состојки.

7. На крај додајте ја чоколадата и сувото овошје и нежно измешајте.

8. Префрлете во калапот и печете 35-40 минути на температура од 175 степени.

9. Оставете го 15 минути да се излади пред да го извадите од калапот.

10. За преливот измешајте ги убаво сите состојки.

Кога е изладен целосно нанесете од преливот.

Уживајте во секој залак.