На првиот ден од официјалната посета на Кралството Шведска, претседателот на Собранието, Африм Гаши, придружуван од пратениците Дафина Стојаноска, Беким Сали и Митко Трајчулески, имаа аудиенција кај кралот на Шведска, Карл Шеснаесетти Густаф (во собраниското соопштение погрешно именуван како „Густав“).

„Во делот на заедничката средба, претседателот и пратениците изразија благодарност за приемот и овозможената средба со неговото височество и нагласија дека Кралството Шведска е искрен и високо почитуван поддржувач на Република Северна Македонија, а меѓусебните односи се карактеризираат со висок степен на пријателство, заемно разбирање и поддршка. Тие беа информирани дека кралот на Шведска, Карл Шеснаесетти Густав, досега двапати ја посетил нашата држава и има посебно убави сеќавања од Охрид“, пишува во соопштението.

Гаши и пратениците Стојаноска, Сали и Трајчулески му подарија на шведскиот крал симболична кошничка од традиционални македонски производи од повеќе различни производители. По заедничката средба и предавањето на подарокот, Кралот и претседателот Гаши осварија полчасовна тет е тет средба.