Гарабаја по победата над Загреб: Ова не е нашето најдобро ниво, можеме многу да се подобриме
Ракометниот клуб Еурофарм Пелистер стартуваше со победа во новата сезона од ЕХФ ракометната Лига на шампионите откако дома во Битола во балканското дерби со 25:23 го совлада Загреб од Хрватска.
Препорачано
Македонскиот првак бодрен од своите навивачи во салата „Боро Чурлевски“ имаше позитива скоро во текот на целиот натпревар и на крајот дојде до првите бодови.
Најефикасен во триумфот на Еурофарм Пелистер беше левото крило Дејан Манасков со осум голови.
Тренерот на екипата, Рубен Гарабаја е задоволен од триумфот, иако верува дека тимот може да покаже многу подобри перформанси:
– Многу е важно да се добијат натпреварите што се клучни за нас во групата. Знаеме дека ова не е нашето најдобро ниво, можеме многу да се подобриме и сме фокусирани на тоа. Мора да размислуваме од натпревар до натпревар, ни следува ПСЖ, но секогаш мора да уживаме во победата. Вечерва уживаме во неа, но од утре ќе се фокусираме на натпреварот во Париз – се зборовите на Гарабаја на официјалниот сајт на ЕХФ по мечот во Битола.
Мечот од второто коло во групата Б, битолскиот состав ќе го има на 18 септември во Париз, Франција, против ПСЖ, со почеток од 20.45 часот.
