Претседателот на Хрватска Зоран Милановиќ денеска е во официјална посета на Македонија. Го пречека претседателката Гордана Силјановска Давкова со официјален протокол.

Најважната порака која ја испрати тој е дека Македонија не треба да биде жртва на никакви притисоци и изнуди за членство во Европската Унија.

„Немојте да бидете само жртва на принуда или некакво изнудување кога станува збор за членство во ЕУ, не мислам на соседната држава Бугарија, тие имаат некои свои идеи како треба тоа да изгледа. Јасно е дека треба да постои консензус. И се се сведува на едно – се додека некој е против, Македонија не може да оди напред. Единствено прашање е дали ова за вас и за вашите граѓани се уште е најважната работа на овој свет вредна во животот или има некои други работи на кои може да се работи да се реализираат“, рече Милановиќ.

Според Милановиќ, на Македонија треба да ѝ се помогне, но не да се третира како посебен случај со посебни потреби.

„Европското право на кое се повикува професорката, е добро да се повторува, но ЕУ не функционира на тој начин. Хрватска е сведок на тоа, чисто да не живееме во илузија, но во ЕУ има и многу добри работи, но не се сите добри особено последните години и месеци“ додаде Милановиќ.

Претседателката Гордана Силјановска Давкова пак рече дека ветото не е пријателски инструмент.

Копенхагенските критериуми се тие кои ќе не направат стандардна европска досадна држава, а ветото не е пријателски инструмент. Очекувам разбирање, а се разбира ние во меѓувреме мора да ја тераме државната агенда, економски, културно да се развиваме, истакна денеска претседателката Гордана Сиљановска Давкова на заедничката прес-конференција во Вила Водно со хрватскиот претседател Зоран Милановиќ.

Немојте да бидете жртва на принуда или изнуда за членство во ЕУ, порача Милановиќ

Сиљановска-Давкова: Копенхагенските критериуми ќе нè направат досадна држава, ветото не е пријателски инструмент