Активистите за заштита на правата на животните, после денешното одложено судење за убиството на кучето Феликс, го пресретнаа обвинетиот кој излезе од задната врата на Кривичниот суд. Предната врата на судот беше блокирана за влез и излез поради големиот метеж и присутните луѓе. Кога обвинетиот излезе од задната врата на судот почнаа бркотници, тој бегаше од насобраните активисти, кои го следеа до црквата „Богородица“ на кејот на Вардар.

Во близина на црквата, пристигна екипа на итната медицинска помош, со која обвинетиот беше транспортиран додека зад него се слушаа извици „убиец“.

Во Основниот Кривичен суд Скопје денеска се одложи судењето за кучето Феликс кое поради тешки повреди нанесени од двајца соизвршители угина на 7 јануари.

Одложувањето е затоа што еден од обвинетите и неговата одбрана го немаат примено обвинителниот предлог, ниту пак решението за одлука за предложената мерка за обезбедување присуство. Обвинетите се товарат за убивање и мачење животни.

Од Здружението „Анима Мунди“ побараа зголемување на санкциите предвидени со член 233 (Убивање и мачење на животни).