Холандскиот фудбалер Квинси Промес кој неодамна беше осуден на шест години затворска казна поради вмешаност во шверц на кокаин е уапсен во Дубаи, пренесуваат руските медиуми.

Според пишувањето на медиумите актуелниот фудбалер на Спартак Москва по кого била распишана Меѓународна потерница бил приведен во Дубаи.

Промес бил запрен на граничната контрола, а потоа одведен во полициска станица во Дубаи заедно со неколку лица од својот клуб. Наводно тој е се уште во притвор додека остатокот од екипата отпатувал и засега не е познато дали ќе биде испратен во Холандија или вратен во Русија.

Во Холандија Промес беше осуден на затворска казна од шест години поради вмешаност во шверц на кокаин, но и плус година ипол поради напад со нож на роднина на семејна прослава. Сепак, бидејќи Холандија и Русија немаат договор за екстрадиција Промес беше безбеден во оваа земја.

Ако Дубаи го испрати Промес во Холандија тогаш тој веднаш ќе започне со отслужување на затворската казна.

„Осудениот фудбалер е ставен на Меѓународна потерница. Обвинителството се обиде да го приведе во Холандија и презема мерки. Меѓутоа се уште тој не е испорачан“, стои во соопштението од обвинителството.

Во кариерата Промес настапуваше за Твенте, Севиља и Ајакс, додека дресот на репрезентацијата на Холандија го носеше на 50 натпревари и постигна пет гола.

Поранешниот холандски репрезентативец, Квинси Промес осуден на шестгодишна затворска казна