Фудбалската репрезентација на Македонија вечерва (20.45 часот на Националната Арена „Тодор Проески“) ќе го има првиот натпревар по настапот на Европското првенство кое се одржа во јуни, противник на „рисовите“ е добро познат ривал, селекцијата на Ерменија.

Во репрезентацијата по настапот на Евро 20202 е свртен нов лист, повеќе ги нема селекторот и капитенот Игор Ангеловски и Горан Пандев и со нов предводник во Благоја Милевски и нов капитен во Стефан Ристовски ги продолжуваат квалификациите за пласман на СП 2023 година во Катар.

– Оптимист сум, иако немавме доволно време да ги пренесеме сите наши замисли и идеи. Но, верувам во фудбалерите и во нивниот професионализам. Тие се добри карактери и се адаптираат на сите нови замисли – вели новиот селектор Благоја Милевски.
Вечерашниот противник е добро познат на фудбалерите бидејќи Македонија и Ерменија беа во иста група во последните две изданија од Лигата на нации и учинокот е половичен, секоја селекција оствари по две победи на домашен терен.

Овој пат влогот е далеку поголем, битка за пласман на Мундијалот кој идната година ќе се одржи во Катар, а по три кола токму Ерменија и Македонија се наоѓаат на првите две места на табелата во групата Ј. Ерменците се лидери во групата со максимални девет бодови, додека Македонија има шест бода но и голема победа над Германија (1:2).
– За сите тактички работи не би зборувал, сите конкурираат за првиот тим, исто како и за формацијата во која ќе настапиме. Ерменија е доста квалитетен тим, се гледа одличната работа на селекторот. Против Шведска и Хрватска одиграа одлични контролни натпревари, имаат три победи во групата и тоа доволно зборува за силата на противникот – додава селекторот Милевски.