Уругвајскиот играч на Тотенхем, Родриго Бентанкур беше суспендиран на седум натпревари од Фудбалската асоцијација на Англија, откако во еден од преносите даде расистичка изјава дека „сите Корејци изгледаат исто“.

Според англискиот Мирор, Бентанкур гостувал во едно уругвајско ТВ шоу, каде зборувал за својот соиграч од Јужна Кореја, Хјун-Мин Сон.

Водителот го прашал фудбалерот дали може да му набави дрес од некој јужнокорејски играч, а Бентанкур одговорил:

– Дрес од Сон? Истото можев да го направам и со братучедот на Сон, сигурно сите изгледаат идентично – беше расистичкиот коментар на Бентанкур.

Ова брзо се прошири на социјалните мрежи, па мораше да реагира Фудбалската асоцијација на Англија и тој нема да може да игра на теренот во следните седум натпревари.

Не се знае дали и Тотенхем ќе му изрече некаква казна, а Бентанкур во меѓувреме му се извини на Сон за навредата.