Државниот јавен обвинител Љупчо Коцевски порача дека и покрај сите проблеми и предизвици со кои се соочува Обвинителство и ако се земе предвид дека борбата со корупцијата не е лесна, тие не се обесхрабруваат. Коцевски најави засилена борба против финансискиот криминал и корупцијата, со низа решителни чекори и конкретни активности, па за таа цел во Јавното обвинителство почна процес на сериозна реорганизација на силите за да се овозможи соодветна динамика на кривичниот прогон и обезбедување на сите докази кои на крај ќе резултираат со ефективни пресуди.

– Во секој посериозен предмет во кој е утврдена противправно стекната имотна корист, особено предметите по кои постапува Обвинителството за гонење на организиран криминал и корупција ќе се спроведува детална финансиска истрага, не само кон сторителите на кривичните дела, туку и кон сите лица поврзани со нив. Истражните центри во ОЈО Скопје, Тетово и Куманово и во ОЈОГОКК работат со полн капацитет, а деновиве ќе објавиме оглас за нивно доекипирање, пополнување на сите испразнети места за истражители – рече Коцевски.

Тој нагласи дека бројот на истражни дејства кои се преземаат преку истражните центри постојано се зголемува, а расте и бројот на институции со кои има целосно дигитална размена на податоци, а формирано е и посебно одделение за сложен и сериозен криминал во ОЈО Скопје каде што има најголем број на предмети и наплив на предмети во последниот период кои опфаќаат тешки кривични дела од финансискиот криминал, но и од сферата на кривичните дела против животот и телото, а се работи и на целосна модернизација на системот на Посебни истражни мерки (ПИМ).

– Сторителите на кривичните дела постојано го усовршуваат начинот на кој ги преземаат криминалните активности, ги менуваат каналите на комуникација, ги користат најсовремените технолошки алатки за да ги прикријат противправните дејства. Мора да држиме чекор со нив дури и да бидеме пред нив, не само во поглед на екипираноста, туку и во меѓусебната координација и соработка – потенцираше Коцевски.

Државниот јавен обвинител е одлучен Обвинителството да ги користи сите можности да се постави на ново и поусогласено ниво соработката со органите на правосудната полиција, со Антикорупциската комисија и Државниот завод за ревизија со кои практично е формиран заеднички одговор кон сите што ги злоупотребуваат јавните финансии, а преку меѓународната соработка полесно ќе се доаѓа до сторителите кои се кријат во други држави. Коцевски ја истакна и соработката со невладините организации и со медиумите кои исто така истражуваат случаи на корупција и злоупотреби на буџетските пари.

– Во изминатиот период веќе се оформени неколку големи предмети  за кои ја информиравме јавноста, а во следниот период очекувам бројот на вакви постапки уште повеќе да се зголеми, а сторителите на коруптивни кривични дела, сите без исклучок, да бидат изведени пред лицето на правдата – нагласи Коцевски.

Денеска на панел – дискусија на тема „Борба против корупцијата“ организирана од Американската амбасада на иста маса седнаа обвинителите и антикорупционерите за да дискутираат за стратегиите за справување и борба со корупцијата. САД очекуваат поголема соработка меѓу Обвинителството, ДКСК и Државниот завод за ревизија како клучни институции за откривање на корупција и незаконско трошење на државните средства.

– Наша заедничка цел е да ја институционализираме соработка, да го подигнеме нивото на одговорност и интегритет и да се спротивставиме на сите облици на корупција. Убедена сум дека соработка којашто ја негуваме ќе даде резултати со кои сите ќе се гордееме. Корупцијата, особено кога зборуваме за системска и длабоко инкорпорирана корупција, го попречува развојот на општеството и неопходните инвестиции во инфраструктурата, образованието, здравството, животната средина. Корупцијата секако ја плаќаме многу скапо, тоа се милијарди долари годишно како изгубени инвестиции кои значат и пропуштен развој на нашата држава – рече Татјана Димитровска, претседателка на ДКСК.

Помошникот на главниот државен ревизор, Марина Блажеска, во обраќањето на дискусијата ја истакна важноста на врховното ревизорско тело во откривањето на злоупотребите на државните средства кои пак потоа стануваат предмет на истрага на Обвинителството.

– Имаме добра соработка со Јавното обвинителство по потпишувањето на меморандумот за соработка. Во 2020 година немавме ниту една повратна информација од Јавното обвинителство, во 2022 година добивавме за 15 дена, а минатата година и за 5 дена – рече Блажевска.