Состојбата со слободата се влошила минатата година, а авторитаризмот се засилил, утврди невладината организација Фридом Хаус, која ја следи состојбата на демократијата ширум светот во својот годишен извештај.

Македонија, исто како и минатата година, има 67 од 100 поени и е рангирана како делумно слободна. Во извештајот се наведува дека земјата продолжува да се бори со корупцијата, и додека медиумите и граѓанското општество учествуваат во енергичен јавен дискурс, новинарите и активистите се соочуваат со притисоци и заплашување.

Од државите во поширокиот регон, најдобро позиционирана е Словенија со индекс 96. Во групата слободни земји се и Грција (85). Хрватска (82) и Бугарија (77). Во делумно слободни, пак, се Црна Гора (69), Албанија (68), Косово (60), Србија (56) и Босна и Херцеговина (52).

Во извештајот се забележува дека и покрај негативните трендови, има неколку случаи на значително подобрување во регионот на Јужна Азија.

Во овогодишното рангирање на Фридом Хаус, непрофитна организација финансирана од американската влада, две земји добија статус на слободни: Сенегал и Бутан, хималајското кралство кое ја консолидира својата транзиција кон демократија преку избори.

Организацијата со седиште во Вашингтон, ја оценува состојбата на слободата во секоја земја користејќи систем на поени од нула до сто, со тоа што колку повеќе поени има земјата, толку е послободна. Во зависност од тоа колку поени добива една земја, таа спаѓа во една од трите категории: слободни земји, делумно слободни и неслободни.