Резолуциите околу малцинските права не се дојдени на третиот комитет, но кога ќе дојдат, ние ќе имаме јасен став околу постоењето на малцинствата и посебно на нашето во соседните земји, вели македонскиот амбасадор во Обединетите нации во Њујорк Љубомир Фрчкоски. Според него, важно е дека во извештаите на ОН постои македонско малцинство во Бугарија и дека бугарската позиција во однос на ова прашање нема влијание.

Фрчкоски вели дека е прашање на факти, а не на политички изјави, дали постои или не одредено малцинство.

– Тоа е прашање на факти кои се утврдуваат со меѓународни извештаи и фактографско пишување на меѓународни организации. А фактите се дека дел од извештатите на ОН евидентираат оти ова малцинство постои, дел од извештаите на Стејт департментот, дел од извештаите на групите за права на малцинствата и сите извештаи од ЕУ. Тоа е прво, и второ се пресудите на Судот во Стразбур – вели Фрчкоски за Гласот на Америка на македонски.

На прашањето дали како амбасадор во ОН ќе покрене иницијатива за осуда на Бугарија дека не ги почитува пресудите на Европскиот суд за човекови права да дозволи регистрација на здруженија кои што имаат за цел признавање на македонското малцинство, Фрчкоски вели:

– Такви резолуции околу малцинските права не се дојдени сега на третиот комитет, но кога ќе дојдат ние ќе имаме јасен став околу постоењето на тие малцинства и почитувањето на нивните права, со една посебна тежина како земја која тоа го прави во својата држава. Во таа смисла, кога ќе дојде моментот и местото за тоа, ние ќе бидеме навистина за правата на малцинствата и посебно за нашето во соседните земји.

Според Фрчкоски, главната линија за признавање на малцинствата и борбата за нивните права оди преку стандардите на ЕУ и пресудите на Стразбур, оти постапката во ОН е „многу подолга, многу покомплицирана и многу поблага во однос на резултатот“. Но, битно е, вели тој, што во ОН се регистрирани поплаки во однос на правата на македонското малцинство во Бугарија.

– Ние сме на страната на земјите кои ги почитуваат стандардите, кои успеале да направат дури неверојатни договори кај идентитетските прашања. Од таа страна и од таа позиција нашиот збор тежи, нашите збор и влијание имаат сосема друга улога отколку како земја која не коже да си ги реши проблемите. Она што мислиме да го направиме е да одржиме едно ниво на присутност и јасност кое историски дефинитивно има право и на краток рок да ја освои својата вистина. Конечно да победи – рече Фрчкоски.