Францускиот парламент денеска ја прифати идеата за законот со кој ќе може медицински да се помогне со оплодувањето за сите жени, како епилог на двегодишните преговори полни со конфликти. Овозможувањето на медицинското помагање за оплодување на немажените жени и на жените од ЛГБТИ заедницата е предизборно ветување на претседателот Емануел Макрон, кои ЛГБТИ заедницата од Франција го чекаа со години, пренесува Гардијан.

По две години исполнети со парламентарни расправии, законот е прифатен со 326 гласови кои се согласиле, 115 биле против, а 42 воздржани, независно од политичките разлики.

Владата предвидува дека првите пријавувања би биле овозможени на крајот од летово, а до крајот на 2021 година ќе се зачнат првите деца.

Медицинското помагање за оплодување на лезбејските парови и за немажените жени е веќе достапно во повеќето големи европски земји како Шведска, Финска, Данска, Велика Британија, Ирска, Белгија, Холандија, Луксембург, Шпанија и Португалија.

Законот е поддржан од 67 % од народот, покажа истражувањето на ИФОП за хомосексуалното здружение.

„Ова е добар ден за нашата земја“ изјави денеска министерот за здравство Оливер Веран, кој го изрази своето задоволство поради исполнетото ветување по парламентарните расправии кои траеле со часови.

Жалбата која ја поднесоа десничарските пратеници кон Уставниот совет би можела во идните недели да го одложи носењето на законот.

Конзервативното движење „Протест за сите“ го осуди насилното туркање на законот и системското отфрлање на секој амандман на оригиналниот предлог.