Треба да плати 10.000 евра: Францускиот претставник на Евровизија казнет за сексуално вознемирување
Францускиот пејач Слиман, кој ја претставуваше Франција на Евровизија во 2024 година со песната „Mon Amour“, е осуден за сексуално вознемирување на техничар и ќе треба да плати казна од 10.000 евра.
Препорачано
Недолго по завршувањето на музичкото натпреварување, Слиман се најде во центарот на вниманието откако еден маж поднесе тужба против него поради сексуално вознемирување.
Станува збор за поранешен техничар кој работел на неговата турнеја во 2023 година. Според тогашните информации, пејачот наводно инсистирал да имаат сексуален однос и на својот поранешен соработник му праќал „бројни пораки и видеоснимки со сексуална или порнографска содржина“, пренесе грчкиот портал „Лајфо“.
Истрагата започнала една година подоцна. Француските медиуми јавуваат дека, според предметот, Слиман се товари дека, меѓу другото, го присилувал мажот да го прегрне и покрај одбивањето, постојано му предлагал сексуален однос.
Судот во Сент Етиен на крајот го прогласи пејачот за виновен за сексуално вознемирување извршено преку дигитални или електронски средства и му изрече условна парична казна од 10.000 евра.
