Изминатиот викенд, Австриската слободарска партија (ФПО) го одржа својот прв предизборен митинг, со кој официјално ја започна кампањата за претстојните избори во Виена. Симболиката е во тоа што ФПО ја започна кампањата во квартот Флоридсдорф, и тоа на местото каде што живее сегашниот градоначалник на Виена, Михаел Лудвиг.

Според говорите на водечките политичари на ФПО, Виена е град на убиства, силувања, криминални банди, криминал, експлозија на трошоците и исламизам. Секој што беше присутен и ги слушаше говорите на партиските лидери можеше да почувствува морници, но не поради дождливото време, туку поради мрачната слика што ја прикажаа претставниците на ФПО за градот. „Црвениот“ градоначалник на Виена беше главна мета на острите критики од страна на ФПО.

Голем број симпатизери веќе беа на местото на настанот повеќе од еден час пред официјалниот почеток на митингот.
Политичката ситуација за ФПО во Виена е многу поповолна овој пат. Пред пет години, поради скандалот „Ибица“ (случај со поткуп), партијата доживеа колапс од 31% на само 7% поддршка. Според актуелните анкети, ФПО сега се движи меѓу 20% и 22%. Сепак, за разлика од националното ниво, каде што партијата во анкетите достигнува над 30%, виенската ФПО не може целосно да ги искористи тие бројки.

Големите урбани зони се голем предизвик за ФПО, а градот Виена е особено тежок терен. Секој глас е многу важен, особено во големите периферни квартови како Флоридсдорф. Во 2015 година, ФПО во овој кварт освои 30,84%, за разлика од 2020 година, кога по скандалот „Ибица“ падна на 9,71%. Сега партијата има можност да поврати значителен дел од тие гласови и дури се надева дека може да ја освои позицијата на општински градоначалник.
За поголем успех на овој митинг, подрачната ФПО-Виена доби поддршка од централната ФПО. Лидерот на ФПО, Херберт Кикл, ја презеде улогата на воведен говорник и не го штедеше својот критички тон. Според него, Виена станала „мрачен град на убиства, силувања, криминални банди и исламизација“, додека социјалистите ја „руинирале и осакатиле“ на економски план.
Кикл истакна дека особено во периферните квартови се развиле „паралелни и спротивставени општества“. Тој го отфрли тврдењето дека Виена е еден од најдобрите градови за живеење, велејќи дека тоа можат да го тврдат само „горните десет илјади“, кои живеат во луксузни станови во центарот на градот. „Под водство на Лудвиг, сè оди наопаку“, заклучи Кикл.
Тој вети дека кандидатот на ФПО, Доминик Неп, ќе ја врати Виена во „жив, достапен и безбеден град“. Иако во минатото секогаш двајцата политичари не беа на иста линија, овој пат Кикл му даде голема поддршка на Неп, нарекувајќи го „паметен, добар човек со срце на вистинското место“. Според Кикл, Неп беше оној кој „по скандалот „Ибица“ ги прими ударите за грешките на другите“.
Иако ФПО знае дека Неп нема да победи за градоначалник на Виена оваа година, Кикл прогнозира дека тоа ќе биде можно на следните избори.

„Јас ќе бидам канцелар во вториот обид, а Доминик ќе биде градоначалник“, изјави Кикл, додавајќи дека на овие избори граѓаните ќе можат да му испратат опомена на Михаел Лудвиг.

На сцената потоа се искачи Неп, кој продолжи со нападите врз Лудвиг, нарекувајќи го „архитект на пропаднатата коалиција“. Како примери за наводната лоша политика на градоначалникот, Неп ги наведе порастот на криминалот, ширењето на исламизмот и експлозијата на животните трошоци.

Според Неп, зголемувањето на криминалните напади, малолетничките банди, силувањата и убиствата се „последица на миграциската криза од 2015 година“.

Тој ја обвини CПО дека наместо да го спречи тоа, „ги привлече овие луѓе со финансиски подароци и давање азил“. Според него, парите што сега одат за Сиријци и Авганистанци би можеле да се искористат за пензии, спречување на зголемувањето на даноците и кириите во социјалните станови или за подобрување на училиштата.

На крајот од својот говор, Неп неколку пати го постави прашањето: „Кој нè изневери?“ и самиот си одговори: „Социјалдемократите!“. Тој е свесен дека нема шанса да стане градоначалник оваа година, но очекува дека мандатот на Лудвиг ќе биде завршен на следните избори.

– Со ваша помош, ова ќе биде последниот мандат на „црвен градоначалник“ – на тоа работиме – порача Неп.