Фото: „Слободен печат“/Драган Митрески

ФОТО+ВИДЕО | Ураганот Грејс Џонс ја фрли во транс публиката во Скопје со моќниот вокал и изглед

Јамајканско-американската пејачка, авторка, актерка и модел, Грејс Џонс, остави неизбришлива трага на секое поле од својата работа, а со настапот во саботата во Скопје, 76-годишната музичарка направи еден вид ретроспектива на својата мината работа.

Фото: „Слободен печат“/Драган Митрески

 

Екстравагантната Џонс, одржа 90-минутен спектакл во придружба на својот тим составен од триесетина луѓе, на стадионот на АРМ во Градски парк во рамките на фестивалот „Скопје колинг“ во организација на „Авалон продукција“. Џонс ги изведе најголемите хитови од речиси петдецениската кариера.

Фото: „Слободен печат“/Драган Митрески

Грејс Џонс ја дефинира музиката, модата и уметноста речиси пет децении и е незаменлив дел од енциклопедиите на поп културата.

Иконата на поп културата, една од најважните жени во глобалната поп-културна средина во незаборавни час и половина, покажа спој на талент и харизма, но и дека годините не се пречка за врвна изведба. Џонс изгледа и звучи нереално, неверојатен перформанс, моќен, продорен глас и изглед.

Фото: „Слободен печат“/Драган Митрески

Модната икона за секоја песна менуваше делови од облеката, користејќи ги своите добро познати стајлинзи од разни видеа и модни ревии и за секоја имаше специјално осмислен настап.

Фото: „Слободен печат“/Драган Митрески

Грејс Џонс со песните ја прошета публиката од Јамајка преку Париз до Њујорк, изведувајќи ги „Jamaica“ „Slave To The Rhythm“, „I’ve Seen That Face Before“, „Love is The Drug“, „Pull Up To The Bumper“, „Nightclubbing“, „Private life“, која ја испеа со многу емоции, како своевиден рецитал. „Pull up to the bumper“ ја изведе качена на рамениците на член од тимот и се поздравуваше со публиката.

Фото: „Слободен печат“/Драган Митрески

Изведувајќи нова песна во фанк ритам ја разигра публиката и во текот на целиот концерт комуницираше со неа. Неверојатна журка со многу танцување!

Моментот кој наиде на најголемо воодушевување кај публиката беше кога вртеше хулахоп околу половината во текот на десетминутната изведба на завршната песна „Slave To The Rhythm“.

Фото: „Слободен печат“/Драган Митрески

Спектакуларниот концерт го заокружи со изведба на легендарната „La Vie En Rose“ .

Џонс сѐ уште изненадува со фасцинантните сценски вештини и непобитната аура на една музичка дива.

Неколкуилјадната публика сведочеше на сериозен визуелен и музички спектакл, приреден од еден од најголемите „мајстори на сцената“ – Грејс Џонс!

Фото: „Слободен печат“/Драган Митрески

И уште еднаш да потврдиме, Грејс Џонс на 76 години звучи и изгледа неверојатно! Судејќи по енергијата што ја има единствената Џонс, таа тука не застанува.

Фото: „Слободен печат“/Драган Митрески

Грејс Џонс ја започна својата музичка кариера во 1977 година, носејќи на сцената неверојатни костими, кои беа важен и составен дел од нејзините настапи. ВХ1 ја вклучи Грејс Џонс во листата на 100 најважни жени на рокенролот, додека „Билборд“ ја смести меѓу 40-те најголеми имиња во клупската култура. Звучната флуидност на нејзината музика, препознатливиот андрогин изглед и нејзините впечатливи визуелизации доведоа до тоа да стане муза и на бројни светки модни дизајнери.

Почитуван читателу,

Нашиот пристап до веб содржините е бесплатен, затоа што веруваме во еднаквост при информирањето, без оглед дали некој може да плати или не. Затоа, за да продолжиме со нашата работа, бараме поддршка од нашата заедница на читатели со финансиско поддржување на Слободен печат. Станете член на Слободен печат за да ги помогнете капацитетите кои ќе ни овозможат долгорочна и квалитетна испорака на информации и ЗАЕДНО да обезбедиме слободен и независен глас кој ќе биде СЕКОГАШ НА СТРАНАТА НА НАРОДОТ.

ПОДДРЖЕТЕ ГО СЛОБОДЕН ПЕЧАТ.
СО ПОЧЕТНА СУМА ОД 100 ДЕНАРИ

Видео на денот