Принцезата од Велс, Кејт Мидлтон, денеска (2 јули) за првпат се појави во јавност по нејзиното отсуство од настанот „Ројал Аскот“ во јуни, што предизвика бројни шпекулации. Таа ја посети градината за благосостојба при болницата во Колчестер, каде што говореше за моќта на природата во процесот на закрепнување – и физички и ментално, но и духовно.

Принцезата, која има 43 години, беше видно расположена и отворено зборуваше за „навистина, навистина тежок“ период по третманот од рак, опишувајќи го своето искуство како „емоционално лудило“.

За ова значајно појавување, Кејт одбра внимателно избрани модни парчиња со длабоко лично значење. Таа носеше крем сако со пруги од брендот „Блазе Милано“, кое првпат го облече за емотивниот портрет објавен во јуни 2024 година, кога за првпат откри детали за својата здравствена состојба. Фотографијата, дело на Мет Портеус, ја прикажуваше Кејт како стои под дрво во шумата кај Виндзор, гледајќи кон небото.

Во придружното писмо тогаш, таа порача дека „постигнува добар напредок“, но искрено додаде: „Сѐ уште не сум надвор од опасност“.

Кејт носеше и ѓердан со гранат, нејзиниот роден камен, бидејќи е родена во јануари, како уште еден личен симбол за моќ и обновување. Комбинацијата ја надополни со пругиран топ, кафени панталони и нејзините омилени патики „Вежа“, создавајќи лежерен, но впечатлив изглед.

Годината беше предизвикувачка и за нејзиниот сопруг, принцот Вилијам, кој во роденденската честитка за неа напиша: „На најневеројатната сопруга и мајка – силата што ја покажа во изминатата година е извонредна. Џорџ, Шарлот, Луис и јас сме горди на тебе. Те сакаме, Кетрин“.

ФОТО | Кејт Мидлтон објави емотивна порака: „Ниеден родител не очекува да чуе дека неговото дете има сериозна болест“