Италијанската компанија „Пирели“, која се занимава со производство на гуми, го претстави својот календар за 2023 година.

Насловен како „Писма до музата“, календарот е омаж на група „извонредни жени“ кои ѝ биле инспирација на австралиската фотографка Ема Самертон.

„Сакав да му се вратам на етимолошкиот корен на зборот ‘муза’ и да прикажам жени кои ме инспирираат поради нивниот придонес во литературата, науката и уметноста“, изјавила фотографката за „Си-ен-ен“, за време на прес-конференцијата посветена на годинашниот календар на „Пирели“.

„Идејата беше (жените) да се претстават во вистинско светло и да се создадат светови кои би можеле да ги рефлектираат и да ги раскажат нивните поголеми приказни“, додала таа.

Музи и магичен реализам

Годинава, четиринаесет успешни фотомодели се претставени како различни „музи“, кои инспираат со својата работа и надвор од модната писта.

На пример, моделот Кара Делевињ има и успешна актерска кариера и неколку одлични улоги во познати филмови. На нејзината фотографија за календарот, таа позира облечена во модно парче направено со макраме техника.

Покрај неа, на годинашниот календар на „Пирели“ се појавија и Емили Ратајковски, Бела Хадид, Карли Клос, Ешли Греам, Лорен Васер, Прешс Ли и други.

Неверојатните фотографии на Ема Самертон беа направени во текот на летото.

Многумина се воодушевени од сценографијата на фотографиите, кои претставуваат еден магичен реализам и кои вклучуваат надреални елементи како глуварчиња, темни шуми, бувови и огледала. Сѐ тоа е дело на сценографката Вика Руч.

За фантастичните костими се погрижи модната советничка Аманда Харлех.

Календарот постои од 1964 година

Календарот на „Пирели“ го доживеа своето прво издание до 1964 година и во минатото беше познат по „гламур фотографијата“ (т.н. еуфемизам за еротска фотографија).

Низ годините, бројни познати фотомодели позираа за овој календар – од Иман, па сѐ до Кејт Мос.

Кога станува збор за фотографите, секоја година се избира ново звучно име од светот на фотографијата, а едни од најпознатите фотографи кои соработувале со „Пирели“ се Ени Лебовиц и Ричард Аведон.

Пред една деценија, луѓето кои работат на календарот решија да ја стават еротиката настрана и да почнат да ја слават различноста во општеството. Затоа денес, наместо разголени фотомодели, на страниците на календарот имаме мажи и жени кои постигнале значајни успеси во различни области.