Неодамна во Париз во престижниот хотел „Шангри Ла“ се одржа традиционалниот Дебитантски бал на кој секоја година 20 млади дами од највлијателните и најбогатите светски семејства се запознаваат со високото општество. Овој настан за првпат се одржал во Версајската палата во 1958 година и оттогаш традицијата не е прекината. Дебитантите ги избираат самите организатори, а сите треба да носат специјално дизајнирани балски фустани со потпис на една од водечките модни куќи.

Оваа година на балот се истакнаа 20-годишната Епл Мартин, ќерката на Гвинет Палтроу и Крис Мартин, како и Лучија Софија Понти, 18-годишната дама чија баба е познатата италијанска актерка Софија Лорен. Епл, повремено ѝ правеше друштво на Гвинет на настаните во Холивуд, па многумина веќе знаат како таа изгледа, но затоа Лучија беше непозната за пошироката јавност. А, внуката на легендарната италијанска дива е вистинска природна убавица!

Таа на балот пристигна во придружба на младиот италијански гроф Алберико ди Карпења Бриви, и пленеше во елегантна и раскошна креација на брендот „Џорџо Армани“. Познатиот италијански дизајнер не само што е пријател на нејзината баба, туку и имал блиска соработка со Софија Лорен во екот на нејзината кариера.

Лучија блескаше во винтиџ балска тоалета без раменици изработена од сатен со златни и сиви риги и украсена со прекрасен сребрен дезен. Изданието го комплетираше со скапо ланче со смарагди, а се одлучи за понежна шминка и лежерни бранови во косата.

„Мојата баба отсекогаш верувала во безвременската елеганција и важноста да се носат оние работи кои ја одразуваат вашата вистинска личност. Додека растев, таа ме научи на вредноста на едноставноста, добриот крој и додавањето оригинален печат на стилот“, изјавила оваа млада дама на “Хелоу!”

Лучија исто така додала дека плакарот на Софија секогаш бил исполнет со парчиња кои раскажувале приказна и дека таа самата го усвоила тој начин на размислување.

 

View this post on Instagram

 

A post shared by Sasha Alexander (@sashaalexander)

„Сакав фустан во кој ќе се чувствувам самоуверено, но ќе ми биде и удобен за носење. Ги гледав фустаните што ги носеа девојките на балот во претходните години и секоја од нив ја избра онаа што добро ги презентираше. Имав само една желба, да најдам фустан кој ќе ми го направи истото“, истакнала таа.

Инаку, оваа тинејџерка е ќерка на Едоардо Понти, помладиот син на Софија Лорен и неговата сопруга – актерката Саша Александар. Интересно е што Саша всушност има српско потекло и нејзиното вистинско име е Сузана Дробњаковиќ.

Лучија пораснала со нејзините родители во Лос Анџелес, но моментално го посетува Универзитетот Браун, каде што студира историја на уметноста и англиски јазик. Софија Лорен, која сега има 90 години, живее во Женева. Сепак, и покрај тоа што се во оддалечени, бабата и внуката често се гледаат.

Џорџо Армани наполни 90 години: Италијанската дива Софија Лорен му го честиташе роденденот