Во Младинскиот културен центар во Скопје од 17 јуни е поставена изложбата на фотографии со наслов „Хор од солисти“ на Иван Иванов (1940, Неготино), кој целиот работен век го минал како фоторепортер на неделниците „Дуга“ и „Практична жена“ за кои подготвил голем број насловни страници и фоторепортажи од општествено-политичкиот живот и културните манифестации и фестивали во некогашна Југославија.

Но, Иван Иванов со својот фотоапарат во рацете снимал сѐ што ќе му привлече внимание од секојдневието, а ги забележувал и возбудливите ревии на Пјер Карден, Живанши, Александар Јоксимовиќ, како и светските артисти и режисери кои доаѓале на фестивалите ФЕСТ и БИТЕФ.

– На фотопортретите на Иванов може да се забележи нешто искрено, топло и старинско, нешто што отскокнува од студенилото на дигиталните снимки – истакнува Тимчо Апостолов, поранешен уредник на македонската ревија „Екран“.

Иван Иванов објавувал фотографии во „Политика“, „Ослобоѓење“, „Дело“, во ревиите „Екран“ (Скопје), „Студио“ (Загреб), „Стоп“ (Љубљана), полски „Екран“, руски „Екран“ и други.

Во 2012 година, Јован Ќирилов, познатиот филозоф, писател, театролог и долгогодишен директор на БИТЕФ, во Галеријата на Академијата на уметности на Србија во Белград, ја отворил самостојната изложба „Некад и сад“ на Иван Аванов, а промотор на изложбата во Скопје, на која се презентирани фотографии од познати артисти, беше македонскиот филмски критичар Влатко Галевски.

– Портретната фотографија на Иванов е истовремено продолжување на неговиот репортерски фланеризам, на неговата талкачка професија… присутност, откривање, бележење. Негови „жртви“ се главно ликови од екс-ЈУ филмската и театарска елита, но и голем број познати фаци од сите области на општествениот живот од последните децении од минатиот век. Овој своевиден визуелен времеплов е, всушност, значајна хроника за културното и уметничкото милје на еден историски период на овие простори, на генерација која живееше со своите современици, со ликовите од фотографиите на Иванов. И практично, оваа изложба е документаристичко структуирана приказна која создава слоевит мозаик во кој и тоа како е присутен формално-естетскиот аспект – истакна Влатко Галевски, кој е своевиден сведок, присутник на создавањето на дел од фотографите, во годините кога белградски ФЕСТ ја собираше светската и домашната актерска и режисерска елита.

Изложбата „Хор од солисти“ на Иван Иванов во горното фоаје на МКЦ ќе биде поставена до 30 јуни.