Во паркот „Авионче“ во скопската населба Аеродром, деновиве мириса на скара, зачини и на свежо печена храна. Луѓето шетаат од штанд до штанд, деца трчаат околу поставените клупи, а од звучниците тече лесна фанк музика која му дава пулс на целиот простор.

Вечерва започна првото издание на „Аеро стрит фуд фестивал“, каде што храната, музиката и урбаната култура се спојуваат во еден живописен празник на вкусот и на заедништвото.

Најдовме време да поразговараме со организаторот Дарко Панчевски, човекот зад идејата што викендов го претвори „Авионче“ во нов гастрономски центар на градот. Тој ни откри како настана фестивалот и што го прави посебен.

Како се роди идејата за овој фестивал? Зошто во паркот „Авионче“?

– Идејата произлезе од потребата Аеродром да добие современ фестивал кој ги обединува уличната гастрономија, музиката и забавата. „Авионче“ беше избрано бидејќи е едно од најубавите зелени катчиња во Аеродром, со простор и атмосфера што овозможуваат вистинско урбано собиралиште за сите генерации.

Што е целта на фестивалот? Што сакате да постигнете?

– Нашата цел е да понудиме уникатно искуство за посетителите, да ги приближиме различните култури преку гастрономија и музика и да создадеме традиција која ќе го позиционира Аеродром како регионален центар на урбан живот.

Колку учесници и штандови со храна ќе има годинава?

– Годинава имаме над 14 штандови со познати брендови и специјализирани гастро понуди, од македонска скара, преку италијанска и азиска кујна, до модерни „стрит фуд“ концепти и десерти.

Што е посебно на ова издание – што го издвојува од други слични настани?

– Посебно е тоа што фестивалот не е само гастрономија, туку целосно искуство. Имаме музичка програма со бендови и со диџеи, забавни предизвици за публиката секоја вечер, простор за семејства и најмладите, како и пријатна урбана атмосфера што го претвора „Авионче“ во највеселото место во градот.

Каква е досегашната реакција на посетителите?

– Реакциите се исклучително позитивни, луѓето се воодушевени што конечно има ваков урбан фестивал. Посетителите ни пренесуваат дека уживаат во понудата, организацијата и во програмата, а и дека настанот им носи нова енергија и повод за дружење.

Дали планирате фестивалот да стане традиционален?

– Да, апсолутно. Нашата визија е „AERO Street Food Festival“ да прерасне во традиција, настан кој секоја година ќе го збогатува културниот и гастрономскиот календар на градот, а со текот на времето да привлече и регионални гости.

Првото издание на фестивалот ќе трае до 8 септември, а влезот е бесплатен.