Во прекрасна атмосфера пред околу 25.000 гледачи на Националната арена „Тодор Проески“ во Скопје најдобрите македонски фудбалери ремизираа 1:1 против големата Белгија.

Пред мечот Белгијците важеа за голем фаворит, тоа и се покажуваше на теренот, а и беа поблиску до победата.

Но, кога е македонското срце во прашање, сè е можно, со сета храброст, издржливост и знаење, успеавме на крајот да освоиме значаен бод.

Реми кое нè остава во трката да ги одржуваме шансите за пласман на Светското првенство во 2026 година.

Следниот предизвик за нашата селекција е на 9 јуни во Астана против репрезентацијата на Казахстан.