Стотици луѓе денеска положуваат цвеќиња и свеќи пред железничката станица во Нови Сад каде вчера животот го загубија 14 лица, откако се урна дел од настрешницата.

Меѓу загинатите е и четириесет и петгодишниот Македонец, Васко Саздовски кој работел во Институтот „Биосенс“ во Нови Сад. Саздовски вчера наутро тргнал на пат кон Скопје каде што живеат неговата сопруга и двете деца.

Министерот за транспорт, градежништво и инфраструктура на Србија – Горан Весиќ денеска изјави дека во тек е увид за утврдување на причината за падот на настрешницата на Железничката станица во Нови Сад, а одговори се очекуваат од Сообраќајниот институт, Железничката инфраструктура на Србија и кинеските изведувачи кои работеле на проектот за реконструкција на таа станица, во кој, како што вели, не била вклучена и самата реконструкција на настрешницата.