После ремито со Унгарија и поразот од Холандија, македонската ракометна репрезентација во третиот натпревар од прелиминарната фаза на Светското првенство триумфираше над Гвинеја со резултат 29:20 (14:10).

И со реми избраниците на селекторот Кирил Лазаров можеа да го обезбедат пласманот во главната фаза каде за ривали ќе ги имаат Франција, Австрија и Катар.

Гвинејците се покажаа како достоен ривал во текот на првото полувреме, на стартот од мечот имаа минимална позитива.

А потоа ние одржувавме предност од еден гол, а африканскиот претставник постепено доаѓаше до егал.

При наша негатива од 7:6, направивме серија од 6:2 што се покажа како клучно за крајниот епилог. На паузата заминавме со водство од 14:10.

Од стартот на второто полувреме само ја зголемувавме позитивата која достигнуваше до „плус шест“ (16:10).

Нападот подобро функционираше, противникот немаше решение за нашата цврста одбрана и тоа резултираше за уште поголема позитива на „плус девет“ (20:11).

До крајот само рутински се одработуваше задачата одржувајќи осум-девет голови разлика за прва победа на Мундијалот.

Нашиот најефикасен ракометар во денешниот триумф беше Филип Кузмановски со 12 голови, а воедно беше и прогласен за играч на натпреварот.