Денеска во рамките од осмото коло во ракометната Лига на шампионите екипата на Еурофарм Пелистер на домашен терен во салата „Боро Чурлевски“ – Битола во тесен финиш ремизираше против данската Фредериција со 29:29 (13:16).

Актуелниот македонски шампион предводен од новиот тренер Раул Алонсо во текот на првото полувреме беше константно во негатива, единствено успеа неколку пати да израмни на стартот од натпреварот на 1:1 и 2:2 со головите на Кузмановски и Атанасијевиќ, а потоа на 4:4 преку Радивојевиќ.

Данците направија мини серија за 6:4 со погодоците на Транкет и Бисгард, по што постепено одржуваа позитива од еден-два голови разлика. Фредериција го контролираше резултатот во своја корист, а во 16 минута имаше и „плус три“ (10:7), а нешто и подоцна и три пати до највисоки „плус четири“ на семафорот, 14:10, 15:11 и 16:12.

Продолжи доминацијата на гостинот и во второто полувреме, а Еурофарм Пелистер со сите сили се обидуваше да одржува резултатска неизвесност. Хосни намали на 18:16, а во 40 минута нашиот шампион се доближи на само „минус еден“ (20:19) за радост на трибините со голот на Кузмановски.

Се подобра стануваше играта на Еурофарм Пелистер во нападот и одбраната, во 45 минута Радивојевиќ стрелаше за нерешени 22:22, а три минути подоцна за прв пат на мечот Еурофарм Пелистер беше во позитива преку Кузмановски.

По голот на Бисгард за нов егал на средбата, во 49 минута Тајник реализираше на спротивната страна за 25:24. По неуспешниот обид на Радивојевиќ, следуваше казната за 25:25 со голот на Мартинусен и се влезе во неизвесна завршница во битолската сала.

Радивојевиќ кој исто така беше расположен за голови, донесе радост за Еурофарм Пелистер за 27:26, но веднаш возврати противникот преку Андерсон Моберг. За 28:27 на шест минути до крајот на мечот се погрижи Пешевски.

Не се предаваше Фредериција, успеа да израмни со голот на Мартинусен, во следниот напад на Еурофарм Пелистер грешка направи Кузмановски, а тоа го казни ривалот кој се врати во водство од 29:28. Во финишот Манасков постигна гол за 29:29 што на крајот беше и конечниот епилог.

Најефикасен во редовите на Еурофарм Пелистер беше Радивојевиќ со седум голови. Еурофарм Пелистер ги одржува шансите за пласман во нокаут-фазата, моментно е на шестото место со четири бодови, пред Фредериција со три и Висла Плоцк со два. Во следното деветто коло битолскиот тим ќе му гостува на унгарскиот состав Веспрем.