Вработените во Зоолошката градина на Скопје решија со ледени десерти да им помагаат на животните, полесно да ги поднесат високите температури, кои деновиве надминаа 40 степени Целзиусови.

Секое утро на менито на животните од зоолошката градина, има замрзнато овошје и многу лубеница. Со овошните „сладоледи“ од замрзнато овошје се насладуваат лемурите, а свежата и блага лубеница е наменета за мајмуните, слоновите и нилските коњи.

Морските лавови, пак, се разладуваат со замрзната риба, а за тигрите и лавовите се подготвуваат сладоледи од месо.

Покрај исхраната, вработените внимаваат животните да се во сенка или во климатизирани простории и постојано да имаат свежа вода, како за пиење, така и за капење.

Во повеќето живеалишта има базени, а животните ги разладуваат и со црево. Најмногу во оваа активност уживаат слоновите и мечките.