Со доделување на почесната Златна палма на актерката Мерил Стрип и премиера на филмот „Вториот чин“ („The Second Act“) на Кантен Дупие започна 77. издание на Меѓународниот филмски фестивал во Кан.

Отворањето на фестивалот го одбележа Мерил Стрип, на која ѝ беше врачена награда од Жилијет Бинош. Француската актерка, обраќајќи ѝ се на добитничката на почесната награда, во еден момент дури и заплака.

„Изградивте толку прекрасно место за себе во историјата на кинематографијата и вие сте меѓународно богатство“, рече Бинош.

Мерил Стрип одговори велејќи дека и таа неодамна плачела поради неа, поточно поради нејзината улога во филмот „Вкусот на нештата“ („The Taste of Things“) (2023).

„Последен пат бев тука пред 35 години. Дотогаш веќе имав три деца, се приближував до четириесеттите и чувствував дека мојата кариера е на надолна патека. И тоа не беше нереално очекување на актерка на таа возраст. Но, сега сум повторно тука, сè продолжува, а најмногу благодарение на исклучително талентираните уметници со кои работев, вклучително и претседателката“, рече Стрип, алудирајќи на годинашната претседателка на жирито – Грета Гервиг.

Добитничката на почесната награда на годинашниот филмски фестивал во Кан се наврати на својата кариера и односот со колегите и публиката.

„Беше како да гледа низ прозорецот на брз воз. Ја гледав мојата младост како наеднаш се претвора во средна возраст, до сега, до овој момент кога стојам овде пред вас. И многу сум благодарна што досега не ти здодеа моето лице и што не сум скокнала од тој воз“.

На отворањето на Фестивалот присуствуваа бројни јавни личности, претежно од светот на филмот.