Мадрид ја збогати својата културна понуда со отворањето на музејот на Бенкси, единствен простор посветен на делото на овој енигматичен британски уметник. Музејот, кој беше отворен во јануари, се наоѓа во поранешен гаражен простор во населбата Арганзуела и содржи најголема колекција на дела од Бенкси во Европа.

Во музејот има повеќе од 170 репродукции на најпознатите дела на уметникот во природна големина, вклучувајќи ја и познатата „Девојче со балон“.

Многу од овие оригинални дела веќе не постојат на своите првобитни локации, било затоа што биле уништени или отстранети од улиците на градови како Лондон, Париз, Њујорк или од зони на конфликти, како Палестина.

Поставката ги внесува посетителите во критичкиот универзум на Бенкси и ги поттикнува на размислување за теми што често се јавуваат во неговата уметност – нееднаквоста, војната, животната средина и социјалната сатира.

Музејот е сместен во поранешен гаражен простор, трансформиран во сала од 2.000 квадратни метри, кој ја задржува својата индустриска суштина. Дискретниот влез е обележан само со сообраќаен знак изменет во стилот на уметникот, што ја одразува неговата филозофија на анонимност и изненадување, кои се заштитен знак на неговата работа.

Со овој музеј, Мадрид им се приклучува на Барселона, Париз, Брисел и Њујорк во оддавањето признание на уметноста на Бенкси.

Огромна криминална мрежа на фалсификати од Бенкси, Ворхол и Пикасо откриена во Италија